Последования утрени, часов, обедницы и вечерни Светлой пятницы для домашнего совершения

Последования утрени, часов, обедницы и вечерни Светлой пятницы для домашнего (келейного) совершения (в формате Word).

Утреня

Часы и обедница

Вечерня

ПАСХА

Светлая Пятница

Последование утрени
для домашнего (келейного) совершения

Празднование иконы Божией Матери
«Живоносный Источник»

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Тропарь, глас 5:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Стих 1: Да воскре́снет Бог, и расточа́тся врази́ Его́, / и да бежа́т от Лица́ Его́ ненави́дящии Его́.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 2: Я́ко исчеза́ет дым, да исче́знут, / я́ко та́ет воск от лица́ огня́. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 3: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 4: Сей день, его́же сотвори́ Госпо́дь, / возра́дуемся и возвесели́мся в онь. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Сла́ва Отцу́ и Сы́ну и Свято́му Ду́ху.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

И ны́не и при́сно и во ве́ки веко́в. Ами́нь.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

И паки:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Го́споди, поми́луй, 12.

Сла́ва, и ны́не:

Канон Пасхи

Песнь 1

Ирмо́с: Воскресе́ния день, просвети́мся, лю́дие; Па́сха, Госпо́дня Па́сха: от сме́рти бо к жи́зни и от земли́ к Небеси́ Христо́с Бог нас преведе́, побе́дную пою́щия.

Припев: Христо́с воскре́се из ме́ртвых.

Очи́стим чу́вствия, и у́зрим непристу́пным све́том Воскресе́ния Христа́ блиста́ющася, и ра́дуйтеся реку́ща я́сно да услы́шим, побе́дную пою́ще.

Христо́с воскре́се из ме́ртвых.

Небеса́ у́бо досто́йно да веселя́тся, земля́ же да ра́дуется, да пра́зднует же мир, ви́димый же весь и неви́димый: Христо́с бо воста́, весе́лие ве́чное.

И кано́н Богоро́дицы в честь Ея ико́ны «Живоно́сный Исто́чник»:

Пресвята́я Богоро́дице, спаси́ нас.

Ны́не источи́ ми, Де́во Богоро́дице исто́чниче, благода́ть даю́щи Сло́ва, я́ко да воспою́ Тя, исто́чник, вре́ющий живо́т и благода́ть ве́рным; Ты бо ипоста́сное Сло́во источи́ла еси́.

Пресвята́я Богоро́дице, спаси́ нас.

Врачевство́ па́че естества́, храм Твой, Честна́я, явля́ется всем, Отрокови́це, от сме́рти бо я́вныя притека́ющия ве́рныя я́ве возставля́ет, и всем незави́стную то́чит сла́дость.

Сла́ва Отцу́ и Сы́ну и Свято́му Ду́ху.

Излива́еши с небесе́ неистощи́мо благода́ти вои́стинну еди́на: слепе́юща бо твори́ши взира́ти к све́ту, бла́том но́вым, возгласи́вши свы́ше па́че смы́сла Лео́нови.

И ны́не и при́сно и во ве́ки веко́в. Ами́нь.

О́бщее любоче́стие челове́чества Честна́я, ра́дуйся Мари́е, ра́дуйся; всех бо Творе́ц на Тя, я́коже ка́пля сни́де я́вственно, исто́чник Тя безсме́ртен показа́в Богоневе́стная.

Катава́сия: Воскресе́ния день, просвети́мся, лю́дие; Па́сха, Госпо́дня Па́сха: от сме́рти бо к жи́зни и от земли́ к Небеси́ Христо́с Бог нас преведе́, побе́дную пою́щия.

Песнь 3

Ирмо́с: Прииди́те, пи́во пие́м но́вое, не от ка́мене непло́дна чудоде́емое, но нетле́ния исто́чник, из гро́ба одожди́вша Христа́, в Не́мже утвержда́емся.

Христо́с воскре́се из ме́ртвых.

Ны́не вся испо́лнишася све́та, Не́бо же и земля́, и преиспо́дняя: да пра́зднует у́бо вся тварь воста́ние Христо́во, в Не́мже утвержда́ется.

Христо́с воскре́се из ме́ртвых.

Вчера́ спогребо́хся Тебе́, Христе́, совостаю́ днесь воскре́сшу Тебе́, сраспина́хся Тебе́ вчера́, Сам мя спросла́ви, Спа́се, во Ца́рствии Твое́м.

Пресвята́я Богоро́дице, спаси́ нас.

Све́тлый Тя святы́й храм Влады́ки всех, Отрокови́це вем, и нетле́ния Исто́чник, во́ду излива́ющ Христа́, от Него́же напая́емся.

Пресвята́я Богоро́дице, спаси́ нас.

От Твоея́ благода́ти, Влады́чице исто́чниче, Самоде́ржцу дае́ши исхо́дов происхожде́ние содержи́мо лю́те, ка́мене подстоя́ние стра́шное, водо́ю разреши́вшееся.

Сла́ва Отцу́ и Сы́ну и Свято́му Ду́ху.

Тече́т благода́ть незави́стная от Тебе́, Богоро́дице Де́во, оби́льно точа́щая, хроми́и ска́чут о Тебе́, прокаже́нных очища́ется мно́жество, и де́мони угнета́ются.

И ны́не и при́сно и во ве́ки веко́в. Ами́нь.

Всем дае́ши исцеле́ние ве́рным, царе́м, простце́м, ни́щим, князе́м, убо́гим, бога́тым о́бще, во́ду излива́яй Исто́чниче разли́чное исцеле́ние.

Катава́сия: Прииди́те, пи́во пие́м но́вое, не от ка́мене непло́дна чудоде́емое, но нетле́ния исто́чник, из гро́ба одожди́вша Христа́, в Не́мже утвержда́емся.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Конда́к Па́схи, глас 8:

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́, я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом мир да́руяй, па́дшим подая́й воскресе́ние.

И́кос

Е́же пре́жде со́лнца Со́лнце, заше́дшее иногда́ во гроб, предвари́ша ко у́тру и́щущия я́ко дне мироно́сицы де́вы, и друга́ ко друзе́й вопия́ху: о други́ни, прииди́те, воня́ми пома́жем Те́ло живоно́сное и погребе́нное, плоть Воскреси́вшаго па́дшаго Ада́ма, лежа́щую во гро́бе. И́дем, потщи́мся, я́коже волсви́, и поклони́мся, и принесе́м ми́ра я́ко да́ры, не в пелена́х, но в плащани́це обви́тому, и пла́чим, и возопии́м: о Влады́ко, воста́ни, па́дшим подая́й воскресе́ние.

Седа́лен Богоро́дицы, глас 8:

Приснотеку́щий Исто́чник, и живо́тный, источа́яй струя́ боже́ственный ток, согла́сно восхва́лим благода́ти прося́ще; на ки́йждо бо день источа́ет исцеле́ния, я́ко рек тече́ния показу́яй мале́йшая. Те́мже по до́лгу приступа́юще с любо́вию, ве́рно почерпе́м от Исто́чника неисчерпа́емое здра́вие, вои́стинну безсме́ртное, ороша́ющее ве́рно благочести́вых сердца́; устна́ми возопии́м, Ты еси́ ве́рных утеше́ние.

Песнь 4

Ирмо́с: На Боже́ственней стра́жи богоглаго́ливый Авваку́м да ста́нет с на́ми и пока́жет светоно́сна А́нгела, я́сно глаго́люща: днесь спасе́ние ми́ру, я́ко воскре́се Христо́с, я́ко всеси́лен.

Христо́с воскре́се из ме́ртвых.

Му́жеский у́бо пол, я́ко разве́рзый де́вственную утро́бу, яви́ся Христо́с; я́ко челове́к же, А́гнец нарече́ся; непоро́чен же, я́ко невку́сен скве́рны, на́ша Па́сха, и я́ко Бог и́стинен, соверше́н рече́ся.

Христо́с воскре́се из ме́ртвых.

Я́ко единоле́тный а́гнец, благослове́нный нам вене́ц Христо́с, во́лею за всех закла́н бысть, Па́сха чисти́тельная, и па́ки из гро́ба кра́сное пра́вды нам возсия́ Со́лнце.

Христо́с воскре́се из ме́ртвых.

Богооте́ц у́бо Дави́д пред се́нным ковче́гом скака́ше игра́я, лю́дие же Бо́жии святи́и, образо́в сбытие́ зря́ще, весели́мся боже́ственне, я́ко воскре́се Христо́с, я́ко всеси́лен.

Пресвята́я Богоро́дице, спаси́ нас.

Па́че песка́ вои́стинну, и ка́плий дожде́вных, бы́ша Богоро́дице мно́жества, исто́чника дел Твои́х, непреста́нно теку́щая на всю зе́млю бога́тно, и вся́каго боля́ща лю́ те ско́ро исцеля́ющая.

Пресвята́я Богоро́дице, спаси́ нас.

На стесне́нный жены́ от карки́на сосе́ц, вода́ возлива́ется, Де́во, исто́чника Твоего́, Влады́чице, и а́бие преста́ша стра́сти смертоно́сныя струе́ю, и карки́н про́сто изы́ти позна́.

Сла́ва Отцу́ и Сы́ну и Свято́му Ду́ху.

Недомы́слимое в Тебе́, и па́че естества́ соде́янное есть я́вственно, Богоро́дице, вода́ бо быва́ет исто́чника Твоего́ исцеле́ние, неду́гом смертоно́сным проти́вное, его́же естество́ я́ве никогда́же ве́дяше.

И ны́не и при́сно и во ве́ки веко́в. Ами́нь.

При́сно умерщвля́ет мя враг сла́стными прило́ги, Влады́чице исто́чниче Богоро́дице, не пре́зри, предвари́ ско́рая по́моще; сего́ же се́тей мя изба́ви, да воспою́ Тя, при́сно многопе́тую.

Катава́сия: На Боже́ственней стра́жи богоглаго́ливый Авваку́м да ста́нет с на́ми и пока́жет светоно́сна А́нгела, я́сно глаго́люща: днесь спасе́ние ми́ру, я́ко воскре́се Христо́с, я́ко всеси́лен.

Песнь 5

Ирмо́с: У́тренюем у́треннюю глубоку́, и вме́сто ми́ра песнь принесе́м Влады́це, и Христа́ у́зрим, пра́вды Со́лнце, всем жизнь возсия́юща.

Христо́с воскре́се из ме́ртвых.

Безме́рное Твое́ благоутро́бие а́довыми у́зами содержи́мии зря́ще, к све́ту идя́ху, Христе́, весе́лыми нога́ми, Па́сху хва́ляще ве́чную.

Христо́с воскре́се из ме́ртвых.

Присту́пим, свещено́снии, исходя́щу Христу́ из гро́ба я́ко Жениху́, и спра́зднуим любопра́зднственными чи́нми Па́сху Бо́жию спаси́тельную.

Пресвята́я Богоро́дице, спаси́ нас.

Глаго́ланная Де́во Отрокови́це, исто́чника Твоего́ вои́стинну чудеса́, ужаса́ют челове́ков помышле́ние; па́че бо естества́ суть, вся ве́рныя освяща́ющая.

Пресвята́я Богоро́дице, спаси́ нас.

Повествова́ руно́, ма́нна и Силоа́м, и ка́мень точа́щь, Соломо́нов притво́р, благода́ть Твою́, Иорда́нския во́ды, и исто́чник самаряны́ни.

Сла́ва Отцу́ и Сы́ну и Свято́му Ду́ху.

Ка́пли Твоя́, Отрокови́це Де́во, я́же исто́чника, и ме́ртваго оживи́ша, па́че сло́ва соде́янное и смы́сла; вся бо Твоя́, Всечи́стая, сло́во побежда́ют челове́ческое.

И ны́не и при́сно и во ве́ки веко́в. Ами́нь.

Стра́сти моя́, Отрокови́це, исцели́, кровотече́ния исто́чник изсуша́ющи, и лю́тое пла́мене возжже́ние, и здра́вия преложе́ние, исхо́дов сою́з, и чревотече́ние.

Катава́сия: У́тренюем у́треннюю глубоку́, и вме́сто ми́ра песнь принесе́м Влады́це, и Христа́ у́зрим, пра́вды Со́лнце, всем жизнь возсия́юща.

Песнь 6

Ирмо́с: Снизше́л еси́ в преиспо́дняя земли́, и сокруши́л еси́ вереи́ ве́чныя, содержа́щия свя́занныя, Христе́, и тридне́вен, я́ко от ки́та Ио́на, воскре́сл еси́ от гро́ба.

Христо́с воскре́се из ме́ртвых.

Сохрани́в це́ла зна́мения, Христе́, воскре́сл еси́ от гро́ба, ключи́ Де́вы не вреди́вый в рождестве́ Твое́м, и отве́рзл еси́ нам ра́йския две́ри.

Христо́с воскре́се из ме́ртвых.

Спа́се мой, живо́е же и неже́ртвенное заколе́ние, я́ко Бог Сам Себе́ во́лею приве́д Отцу́, совоскреси́л еси́ всеро́днаго Ада́ма, воскре́с от гро́ба.

Пресвята́я Богоро́дице, спаси́ нас.

Словеса́ Сло́ва, я́ко вои́стинну исто́чника, воспева́ем Тя, Чи́стая, прему́дрости бо глубину́, я́ко па́че сло́ва ражда́еши, пове́сивша на возду́се тече́ния, и зе́млю на воде́.

Пресвята́я Богоро́дице, спаси́ нас.

Подшла́ еси́ ле́ствиц несе́ние, отъе́млющее сокруше́ние и́же та́мо живопи́сцов, о всесвяты́й исто́чниче! спаса́яй лю́ди от тру́са до́му па́дшия.

Сла́ва Отцу́ и Сы́ну и Свято́му Ду́ху.

Утро́бы неродя́щия непло́дством пре́жде, разреша́еши я́ве, исто́чника Твоего́ струя́ми, и́бо я́ко роди́вшая Влады́ку всех, и рожде́ния подае́ши.

И ны́не и при́сно и во ве́ки веко́в. Ами́нь.

Ни сло́во, ни ум, ниже́ язы́к Твое́ возмо́гут, Чи́стая, Рождество́ похвали́ти, но немощству́ют в Тебе́, и облича́ется филосо́фов че́стность, и ри́торов красота́.

Катава́сия: Снизше́л еси́ в преиспо́дняя земли́, и сокруши́л еси́ вереи́ ве́чныя, содержа́щия свя́занныя, Христе́, и тридне́вен, я́ко от ки́та Ио́на, воскре́сл еси́ от гро́ба.

Та́же:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Конда́к Богоро́дицы, глас 8:

От неистощи́мыя Ты, исто́чниче богоблагода́тный, подае́ши ми, точа́щи во́ды Твоея́ благода́ти, приснотеку́щий па́че сло́ва, я́ко бо Сло́во ро́ждшая па́че смы́сла, молю́ Ти ся, ороси́ мя благода́тию, да зову́ Ти: ра́дуйся, водо́ спаси́тельная.

Икос: Нескве́рная Богоро́дице, ро́ждшая Сло́во О́тчее, пре́жде век нетле́нно ро́ждшееся, разшири́ моя́ уста́, Чи́стая, спривнося́щи мя к Твоему́ похвале́нию, я́ко да восхвалю́ Тя, зовы́й исто́чнику Твоему́ сия́: ра́дуйся, исто́чниче ра́дости непреста́емыя; ра́дуйся, то́че добро́ты неизрече́нныя. Ра́дуйся, неду́гов разли́чных разреше́ние; ра́дуйся страсте́й вся́ких потопле́ние. Ра́дуйся струе́ светови́днейшая, здра́вы творя́щая ве́рныя; ра́дуйся водо́ благода́тнейшая неду́гующим многоразли́чно. Ра́дуйся ча́ше ма́нны живото́чныя; ра́дуйся ба́не и не́ктарю богоизлия́нный. Ра́дуйся водо́, прему́дрости неве́дение отъе́млющая; ра́дуйся растворе́ние се́рдца, пи́щу боже́ственную излива́ющее. Ра́дуйся приста́нище неможе́ния источа́ющая; ра́дуйся пла́мень неду́гования угаша́ющая. Ра́дуйся водо́ спаси́тельная.

Синаксарий

В пятницу Светлой Седмицы празднуем обновление храма Пресвятой Госпожи нашей Богородицы, именуемого «Живоносный Источник». Вспоминаем, сверх того, великих и естество превосходящих чудесах, что совершены в храме сем Матерью Божией.

Изначально храм сей был устроен царем Львом Великим, который именовался также Макелл. По сострадательному нраву своему человек добрый и весьма милостивый, он, будучи до восшествия на престол простолюдином, оказался однажды у места [где воздвигли впоследствии храм] и, встретив потерявшего зрение калеку, за руку его повел. И когда поравнялись с тем местом, мучимый жаждой слепец попросил Льва освежить его водою. Он же, зайдя в чащу леса (ибо место поросло различными деревьями и густым кустарником), принялся искать воду, а когда не нашел, отправился в огорчении назад. И на обратном пути был ему голос, словно свыше, который произнес: «Не должно, Лев, тебе печалиться, ибо вода рядом». И воротясь, искал опять, и когда весьма утомился, был ему снова голос, подобный первому: «Царь Лев, углубись в чащу и, набрав в пригорошни илистой воды, утоли жажду слепца. И помазав ему незрячие очи, тотчас узнаешь Кто Я, издавна обитающая на месте сем». Он поступил, как указывал голос, и слепец тотчас прозрел.

А после того, как Лев, по проречению Богоматери, стал царем, над источником сооружена была церковь, видимая поныне, и совершались на месте том многочисленные чудеса. Но когда по прошествии времени здесь же получил исцеление величайший самодержец ромеев Иустиниан, страдавший задержанием мочи, он, ревнуя о славе Матери Слова, возвел в Ее честь великолепный храм. Впоследствии храм этот, рассевшийся от бывших в разные годы землетрясений, спасли от разрушения Василий Македонянин и сын его Лев Мудрый, в чьи времена совершались от источника самые многочисленные чудеса.

Ибо он исцелял нарывы, мочекаменную болезнь, чахотку и множество других недугов: рак, различные кровотечения у цариц и иных женщин и всякого рода горячку, лихорадку трехдневную и прочие язвы. Разрешал он также бесплодных, и даром сего источника был родившийся у царицы Зои Константин Порфирогенет. Источник, однако, и мертвеца воскресил. Тот был родом из Фессалии и вот, отправившись к потоку, на пути скончался. Умирая и находясь при последнем издыхании, он поручает корабельщикам привезти его в храм Источника и, облив тремя кувшинами ключевой воды, там похоронить, что те и исполнили. И как только возлили воду, умерший воскрес. Впоследствии же, когда великий сей храм готов был обрушиться, явившаяся Богородица поддерживала его, доколе отовсюду, стекшийся туда народ наружу не выбрался. Та вода, стоило ее испить, прогоняла демонов и узников освобождала в темницах. У царя Льва Мудрого исцелила она мочекаменную болезнь, а у жены его Феофано укротила сильнейшую горячку. И брата царского, патриарха Стефана избавила от предрас­положенности к чахотке, и патриарху Иерусалимскому Иоанну исправила поврежденный слух. Вылечила лютую лихорадку у патриарха Тарасия и матери его Магистриссы, а у сына Стилиана задержание мочи. Женщину по имени Схизена от непрерывного поноса освободила, а царь Роман из Лекапы этой же водой и расслабление, и запор желудка лечил, также и супруга его. В Халдии исцеляет Богоматерь монаха Пеперия и его ученика ради призывания Ее помощи, также и оклеветанных перед царем монахов Матфея с Мелетием. А кто расскажет о всех патрикиях, протоспафариях и множестве иных? Так ради твердости в молитве и ради приношения благовоний получает помощь Стефан.

И какой язык поведает все, что вода сия произвела и доныне производит? А те чудеса, что сами мы в свое время видели, превосходят численностью дождевые капли, звезды и листья. Сверх всякого естества исцеляла она гноящиеся язвы, прободения и иные смертоносные раны, жар, проказу и увечья, врачевала также опухоли женские и большинство душевных страстей, равно как подслеповатость, бельма глазные и потемневшие хрусталики. У варяга Иоанна вылечила водянку и у другого варяга злокачественные нарывы, у монаха Мелетия едкую сыпь кожную, у Марка-иеромонаха удушье, что пятнадцать лет его мучило, а также у монаха Макария при схожих обстоятельствах мочекаменную болезнь. И множество иного есть, что совершила, совершает и не перестает совершать Матерь Божия.

По молитвам Твоей Матери, Христе Боже наш, помилуй нас.

Та́же:

Воскресе́ние Христо́во ви́девше, поклони́мся Свято́му Го́споду Иису́су, еди́ному Безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты́ бо еси́ Бог наш, ра́зве Тебе́ ино́го не зна́ем, и́мя Твое́ имену́ем. Прииди́те, вси ве́рнии, поклони́мся свято́му Христо́ву Воскресе́нию: се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́. Трижды.

Воскре́с Иису́с от гро́ба, я́коже прорече́, даде́ нам живо́т ве́чный и ве́лию ми́лость. Трижды.

Песнь 7

Ирмо́с: О́троки от пе́щи изба́вивый, быв Челове́к, стра́ждет я́ко сме́ртен, и Cтра́стию сме́ртное в нетле́ния облачи́т благоле́пие, еди́н благослове́н отце́в Бог и препросла́влен.

Христо́с воскре́се из ме́ртвых.

Жены́ с ми́ры богому́дрыя в след Тебе́ теча́ху, Его́же я́ко ме́ртва со слеза́ми иска́ху, поклони́шася ра́дующияся Живо́му Бо́гу и Па́сху та́йную Твои́м, Христе́, ученико́м благовести́ша.

Христо́с воскре́се из ме́ртвых.

Сме́рти пра́зднуем умерщвле́ние, а́дово разруше́ние, ино́го жития́ ве́чнаго нача́ло, и игра́юще пое́м Вино́внаго, еди́наго благослове́ннаго отце́в Бо́га и препросла́вленнаго.

Христо́с воскре́се из ме́ртвых.

Я́ко вои́стину свяще́нная и всепра́зднственная сия́ спаси́тельная нощь, и светоза́рная, светоно́снаго дне воста́ния су́щи провозве́стница: в не́йже безле́тный Свет из гро́ба пло́тски всем возсия́.

Пресвята́я Богоро́дице, спаси́ нас.

Почерпи́те неду́гующии исцеле́ния; Всечи́стая бо то́чит от боже́ственнаго исто́чника сла́дость и́стинную, пото́к сла́дости вои́стинну вре́ющий, те́мже и ве́рою то́ки незави́стныяпоче́рпем вси.

Пресвята́я Богоро́дице, спаси́ нас.

Удивля́ют слы́шащия, Влады́чице, стра́нная Твоя́ чудеса́, вся ве́рныя: немы́я бо и глухи́я, я́ко благоглаго́ливыя показу́ет вода́ Твоя́, стра́ждущия же лю́те врачу́ет, и исцеле́ние да́рует.

Сла́ва Отцу́ и Сы́ну и Свято́му Ду́ху.

Возво́диши от пе́щи скорбе́й, ороша́ющи вода́ми от стра́ннаго исто́чника, приступа́ющия к Тебе́, Чи́стая: карки́нския бо ра́ны свобожда́ется челове́к, прокаже́нна же исцеля́еши, и распале́ние угаси́ла еси́ .

И ны́не и при́сно и во ве́ки веко́в. Ами́нь.

Ю́ноши и отрокови́цы Влады́чицу, и вси челове́цы ве́рою от души́ восхва́лим све́тло; сокруше́ния бо гное́виц, и вре́ды лука́вых, и ото́ки, и разсла́бленнаго исцели́.

Катава́сия: О́троки от пе́щи изба́вивый, быв Челове́к, стра́ждет я́ко сме́ртен, и Cтра́стию сме́ртное в нетле́ния облачи́т благоле́пие, еди́н благослове́н отце́в Бог и препросла́влен.

Песнь 8

Ирмо́с: Сей нарече́нный и святы́й день, еди́н суббо́т царь и госпо́дь, пра́здников пра́здник и торжество́ есть торже́ств: во́ньже благослови́м Христа́ во ве́ки.

Христо́с воскре́се из ме́ртвых.

Прииди́те, но́ваго виногра́да рожде́ния, Боже́ственнаго весе́лия, в наро́читом дни Воскресе́ния, Ца́рствия Христо́ва приобщи́мся, пою́ще Его́ я́ко Бо́га во ве́ки.

Христо́с воскре́се из ме́ртвых.

Возведи́ о́крест о́чи твои́, Сио́не, и виждь: се́ бо приидо́ша к тебе́, я́ко богосве́тлая свети́ла, от за́пада, и се́вера, и мо́ря, и восто́ка ча́да твоя́, в тебе́ благословя́щая Христа́ во ве́ки.

Пресвята́я Тро́ице, Бо́же наш, сла́ва Тебе́.

О́тче Вседержи́телю, и Сло́ве, и Ду́ше, треми́ соединя́емое во Ипоста́сех Естество́, Пресу́щественне и Пребоже́ственне, в Тя крести́хомся и Тя благослови́м во вся ве́ки.

Пресвята́я Богоро́дице, спаси́ нас.

Боже́ственную исто́чник и честну́ю во́ду излива́ет Твой Де́во; водны́х бо тече́ние вспяща́ет зело́, призыва́нием боже́ственным благода́ти. Те́мже тя почита́ем, исто́чниче, во ве́ки.

Пресвята́я Богоро́дице, спаси́ нас.

Вси честну́ю живото́чную во́ду воспои́м му́дренне: злодыха́ния бо ток по страна́м уставля́ет, и свобо́дное твори́т происхожде́ние. О́ле Твои́х чуде́с, Чи́стая Богороди́тельнице!

Благослови́м Отца́ и Сы́на и Свята́го Ду́ха, Го́спода.

Ка́я, Всепе́тая, восхва́лят уста́ Рождества́ Твоего́ стра́нное? Но и ум кий бы чуде́с исто́чник изсле́довал, и сло́во изглаго́лало? Несть естеству́ кре́пость, Твои́м чуди́тися.

И ны́не и при́сно и во ве́ки веко́в. Ами́нь.

Вся о Тебе́ сме́рти держа́ва разори́ся внеза́пу, о Цари́це и Госпоже́, и́бо Царя́ Безсме́ртнаго, живо́т Ты источи́ла еси́, во́ду, ма́нну, Христа́ во ве́ки.

Катава́сия: Сей нарече́нный и святы́й день, еди́н суббо́т царь и госпо́дь, пра́здников пра́здник и торжество́ есть торже́ств: во́ньже благослови́м Христа́ во ве́ки.

Припев:

Вели́чит душа́ моя́ воскре́сшаго тридне́вно от гро́ба, Христа́ Жизнода́вца.

Песнь 9

Ирмо́с: Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.

Припевы: Вели́чит душа́ моя́ во́лею страда́вша, и погребе́нна, и воскре́сшаго тридне́вно от гро́ба.

Христо́с но́вая Па́сха, же́ртва жива́я, А́гнец Бо́жий, взе́мляй грехи́ ми́ра.

А́нгел вопия́ше Благода́тней: Чи́стая Де́во, ра́дуйся! И па́ки реку́: ра́дуйся! Твой Сын воскре́се тридне́вен от гро́ба, и ме́ртвыя воздви́гнувый: лю́дие, весели́теся.

Возбуди́л еси́, усну́в, ме́ртвыя от ве́ка, ца́рски рыка́вый я́ко от Иу́ды лев.

О Боже́ственнаго, о любе́знаго, о сладча́йшаго Твоего́ гла́са! С на́ми бо нело́жно обеща́лся еси́ бы́ти до сконча́ния ве́ка, Христе́: Его́же, ве́рнии, утвержде́ние наде́жды иму́ще, ра́дуемся.

Припевы: Магдали́на Мари́я притече́ ко гро́бу, и Христа́ ви́девши, я́ко вертогра́даря вопроша́ше.

А́нгел облиста́яй жена́м вопия́ше: преста́ните от слез, я́ко Христо́с вос­кре́се.

Христо́с воскре́се, смерть попра́вый и ме́ртвыя воздви́гнувый: лю́дие, весели́теся.

О Па́сха ве́лия и свяще́ннейшая, Христе́! О му́дросте, и Сло́ве Бо́жий, и си́ло! Подава́й нам и́стее Тебе́ причаща́тися в невече́рнем дни Ца́рствия Твоего́.

Припев: Ра́дуйся, Де́во, ра́дуйся, ра́дуйся, Благослове́нная, ра́дуйся, Препросла́вленная: Твой бо Сын воскре́се тридне́вен от гро́ба.

Во́ды вся превосхо́дит, Отрокови́це Чи́стая, исто́чника Твоего́ вода́, я́ве да́рующая свобожде́ние неду́гов лю́тых, и душа́м вся́кое здра́вие, я́ко па́че естества́ излива́емая.

Припев: Ра́дуйся, Де́во, ра́дуйся, ра́дуйся, Благослове́нная, ра́дуйся, Препросла́вленная: Твой бо Сын воскре́се тридне́вен от гро́ба.

Во́ды вся превосхо́дит, Отрокови́це Чи́стая, исто́чника Твоего́ вода́, я́ве да́рующая свобожде́ние неду́гов лю́тых, и душа́м вся́кое здра́вие, я́ко па́че естества́ излива́емая.

Припев: Ра́дуйся, Де́во, ра́дуйся, ра́дуйся, Благослове́нная, ра́дуйся, Препросла́вленная: Твой бо Сын воскре́се тридне́вен от гро́ба.

Реши́тель неду́гов но́вый се Силоа́м, исто́чника Твоего́, Де́во, зрим вси: о́чи бо прие́млет огня́, вси же здра́вие при́сно к животу́ прие́млем.

Припев: Ра́дуйся, Де́во, ра́дуйся, ра́дуйся, Благослове́нная, ра́дуйся, Препросла́вленная: Твой бо Сын воскре́се тридне́вен от гро́ба.

Здра́вия и́ щущии притецы́те ко исто́чнику; Отрокови́ца бо Де́ва жи́тельствует при воде́. Лику́й и весели́ся ве́рных мно́жество си́це, я́коже подоба́ет, и́же бо прии́дет к хра́му, воздая́ние проше́ний прие́млет.

Припев: Ра́дуйся, Де́во, ра́дуйся, ра́дуйся, Благослове́нная, ра́дуйся, Препросла́вленная: Твой бо Сын воскре́се тридне́вен от гро́ба.

Возвы́сися исто́чника Твоего́ вода́ вы́ше небе́с, и земли́ бе́здны то́ки претече́; сия́ есть пи́ща души́, питие́ ве́рных, мед из ка́мене, и ма́нны раздая́ние.

Припев: Ра́дуйся, Де́во, ра́дуйся, ра́дуйся, Благослове́нная, ра́дуйся, Препросла́вленная: Твой бо Сын воскре́се тридне́вен от гро́ба.

Весели́ши Де́во царя́ преесте́ственне, источа́ющи благода́ть от исто́чника присносу́щную, сему́ подава́ющи на враги́ кре́пость, побе́ды при́сно, здра́вие и мир, и проше́ний исполне́ние.

Припев: Вели́чит душа́ моя́ воскре́сшаго тридне́вно от гро́ба, Христа́ Жизнода́вца.

Катава́сия: Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.

Та́же:

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Го́споди, поми́луй. Трижды.

Сла́ва, и ны́не:

Ексапостила́рий Па́схи:

Пло́тию усну́в, я́ко мертв, Царю́ и Го́споди, тридне́вен воскре́сл еси́, Ада́ма воздви́г от тли, и упраздни́в смерть: Па́сха нетле́ния, ми́ра спасе́ние. Трижды.

Ексапостила́рий Исто́чника:

Исто́чник еси́ вои́стинну воды́ живы́я, Влады́ чице, измыва́еши у́бо неду́ги душ и теле́с лю́тыя, прикоснове́нием Твои́м еди́ным то́кмо, во́ду спасе́ния Христа́ излива́ющи.

Хвали́тны

Глас 6:

Вся́кое дыха́ние да хва́лит Го́спода. Хвали́те Го́спода с небе́с, хвали́те Его́ в вы́шних. Тебе́ подоба́ет песнь Бо́гу. Хвали́те Его́, вси А́нгели Его́, хвали́те Его́, вся Си́лы Его́. Тебе́ подоба́ет песнь Бо́гу.

На 6: Сотвори́ти в них суд напи́сан. Сла́ва сия́ бу́дет всем преподо́бным Его́.

Крест Твой, Го́споди, жизнь и воскресе́ние лю́дем Твои́м есть, и наде́ющеся нань, Тебе́ воскре́сшаго Бо́га на́шего пое́м: поми́луй нас.

Хвали́те Бо́га во святы́х Его́, хвали́те Его́ во утверже́нии си́лы Его́.

Погребе́ние Твое́, Влады́ко, рай отве́рзе ро́ду челове́ческому: и от истле́ния изба́вльшеся, Тебе́ воскре́сшаго Бо́га на́шего пое́м: поми́луй нас.

На 4: Хвали́те Его́ на си́лах Его́, хвали́те Его́ по мно́жеству вели́чествия Его́.

Со Отце́м и Ду́хом Христа́ воспои́м, воскре́сшаго из ме́ртвых, и к Нему́ вопии́м: Ты Живо́т еси́ наш и Воскресе́ние, поми́луй нас.

Хвали́те Его́ во гла́се тру́бнем, хвали́те Его́ во псалти́ри и гу́слех.

Тридне́вен воскре́сл еси́, Христе, от гро́ба я́коже пи́сано есть, совоздви́гнувый пра́отца на́шего. Те́мже Тя и сла́вит род челове́ческий, и воспева́ет Твое́ воскресе́ние.

Глас 2:

Хвали́те Его́ в тимпа́не и ли́це, хвали́те Его́ во стру́нах и орга́не.

Вода́ исто́чника, спаси́тельная есть всем немощству́ющим; присту́пим ве́рою, благода́ть почерпе́м.

Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Кла́дязь живото́чный исто́чника безсме́ртнаго, приступа́ющим любо́вию, исцеле́ний подае́т излия́ние неисчерпа́емое.

Хвали́те Его́ в тимпа́не и ли́це, хвали́те Его́ во стру́нах и орга́не.

Укрепля́ет ду́ши вода́ Де́выя, и́же в скве́рнах страсте́й, притеце́м ко Отрокови́це, и сия́ измы́ем.

Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Ру́чка свяще́нная, и ма́нна незави́стная из пречи́стыя утро́бы, излива́ет Влады́ку, потре́бу вся́ческую поче́рпем.

Стихиры Пасхи, глас 5:

Стих: Да воскре́снет Бог, и расточа́тся врази́ Его́.

Па́сха свяще́нная нам днесь показа́ся: Па́сха но́ва свята́я, Па́сха та́инственная, Па́сха всечестна́я, Па́сха, Христо́с Изба́витель, Па́сха непоро́чная, Па́сха вели́кая, Па́сха ве́рных, Па́сха, две́ри ра́йския нам отверза́ющая, Па́сха, всех освяща́ющая ве́рных.

Стих: Я́ко исчеза́ет дым, да исче́знут.

Прииди́те от виде́ния, жены́ благове́стницы, и Сио́ну рцы́те: приими́ от нас ра́дости благове́щения Воскресе́ния Христо́ва; красу́йся, лику́й и ра́дуйся, Иерусали́ме, Царя́ Христа́ узре́в, из гро́ба, я́ко Жениха́, происходя́ща.

Стих: Та́ко да поги́бнут гре́шницы от лица́ Бо́жия, а пра́ведницы да возвеселя́тся.

Мироно́сицы жены́, у́тру глубоку́, предста́вша гро́бу Живода́вца, обрето́ша А́нгела, на ка́мени седя́ща, и той, провеща́в им, си́це глаго́лаше: что и́щете Жива́го с ме́ртвыми? Что пла́чете Нетле́ннаго во тли? Ше́дше, пропове́дите ученико́м Его́.

Стих: Сей день, его́же сотвори́ Госпо́дь, возра́дуемся и возвесели́мся вонь.

Па́сха кра́сная, Па́сха, Госпо́дня Па́сха, Па́сха всечестна́я нам возсия́. Па́сха, ра́достию друг дру́га обы́мем. О Па́сха! Избавле́ние ско́рби, и́бо из гро́ба днесь, я́ко от черто́га возсия́в, Христо́с жены́ ра́дости испо́лни, глаго́ля: пропове́дите апо́столом.

Сла́ва, и ны́не:

Воскресе́ния день, и просвети́мся торжество́м, и друг дру́га обы́мем; рцем: бра́тие, и ненави́дящим нас прости́м вся Воскресе́нием, и та́ко возопии́м: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Та́же:

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Го́споди, поми́луй. 40.

Сла́ва, и ны́не:

Го́споди, поми́луй. 12.

Сла́ва, и ны́не:

Утверди́, Бо́же, святу́ю правосла́вную ве́ру правосла́вных христиа́н во век ве́ка.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Отпу́ст

Христе́, воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый, и́стинный Бо́же наш, моли́твами Пречи́стыя Твоея́ Ма́тере и всех святы́х, поми́луй и спаси́ нас, я́ко Благ и Человеколю́бец. Аминь.

Христос Воскресе! Воистину Воскресе!

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

И нам дарова́ живо́т ве́чный, покланя́емся Его́ тридне́вному Воскресе́нию.

Вели́каго господи́на и отца́ на́шего Кири́лла, / Святе́йшаго Патриа́рха Моско́вскаго и всея́ Руси́, / и господи́на на́шего высокопреосвяще́ннейшаго и́мярек, / митрополи́та [или́: архиепи́скопа; или́: преосвяще́ннейшаго и́мярек, епи́скопа] [его́же есть о́бласть], / настоя́теля, бра́тию и прихо́жан свята́го хра́ма на́шего, / домоча́дцы на́ша и вся правосла́вныя христиа́ны, / Го́споди, сохрани́ их на мно́гая ле́та.

Последование часов и обедницы
для домашнего (келейного) совершения

Празднование иконы Божией Матери
«Живоносный Источник»

ЧАСЫ СВЯТЫЯ ПАСХИ

Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас. Ами́нь.

Тропа́рь, глас 5

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Воскресе́ние Христо́во ви́девше, поклони́мся Свято́му Го́споду Иису́су, еди́ному Безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты́ бо еси́ Бог наш, ра́зве Тебе́ ино́го не зна́ем, и́мя Твое́ имену́ем. Прииди́те, вси ве́рнии, поклони́мся свято́му Христо́ву Воскресе́нию: се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́. Трижды.

Ипакои́, глас 4

Предвари́вшия у́тро я́же о Мари́и, и обре́тшия ка́мень отвале́н от гро́ба, слы́шаху от А́нгела: во све́те присносу́щнем Су́щаго с ме́ртвыми что и́щете, я́ко челове́ка? Ви́дите гро́бныя пелены́, тецы́те и ми́ру пропове́дите, я́ко воста́ Госпо́дь, умертви́вый смерть; я́ко есть Сын Бо́га, спаса́ющаго род че­лове́ческий.

Конда́к, глас 8

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом мир да́руяй, па́дшим подая́й воскресе́ние.

Во гро́бе пло́тски, во а́де же с душе́ю я́ко Бог, в раи́ же с разбо́йником, и на Престо́ле был еси́, Христе́, со Отце́м и Ду́хом, вся исполня́яй, Неопи́санный.

Сла́ва:

Я́ко живоно́сец, я́ко рая́ красне́йший, вои́стину и черто́га вся́каго ца́рскаго показа́ся светле́йший, Христе́, гроб Твой, исто́чник на́шего воскресе́ния.

И ны́не:

Вы́шняго освяще́нное Боже́ственное селе́ние, ра́дуйся. Тобо́ю бо даде́ся ра́дость, Богоро́дице, зову́щим: благослове́нна Ты в жена́х еси́, всенепоро́чная Влады́чице.

Го́споди, поми́луй. 40.

Сла́ва, и ны́не:

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас. Ами́нь.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Сла́ва, и ны́не:

Го́споди, поми́луй. Трижды.

Отпу́ст

Воскресы́й из ме́ртвых, Христе́, и́стинный Бо́же наш, моли́твами Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, поми́луй и спаси́ нас, я́ко Благ и Человеколю́бец. Ами́нь.

ОБЕДНИЦА

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Антифон первый, псалом 65, глас 2:

Стих 1: Воскли́кните Го́сподеви вся земля́.

Припев: Моли́твами Богоро́дицы, Спа́се спаси́ нас.

То́йже стих: Воскли́кните Го́сподеви вся земля́, по́йте же и́мени Его́, дади́те сла́ву хвале́ Его́.

Припев: Моли́твами Богоро́дицы, Спа́се спаси́ нас.

Стих 2: Рцы́те Бо́гу: коль стра́шна дела́ Твоя́, во мно́жестве си́лы Твоея́ со́лжут Тебе́ врази́ Твои́.

Припев: Моли́твами Богоро́дицы, Спа́се спаси́ нас.

Стих 3: Вся земля́ да покло́нится Тебе́, и пое́т Тебе́, да пое́т же и́мени Твоему́ Вы́шний.

Припев: Моли́твами Богоро́дицы, Спа́се спаси́ нас.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Припев: Моли́твами Богоро́дицы, Спа́се спаси́ нас.

Антифон вторый, псалом 66, глас тойже:

Стих 1: Бо́же уще́дри ны и благослови́ ны.

Припев: Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа. Единожды.

То́йже стих: Бо́же, уще́дри ны и благослови́ ны, просвети лице Твое́ на ны и поми́луй ны.

Припев: Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа. Единожды.

Стих 2: Да позна́ем на земли́ путь Твой, во всех язы́цех спасе́ние Твое́.

Припев: Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа. Единожды.

Стих 3: Да испове́дятся Тебе́ лю́дие, Бо́же, да испове́дятся Тебе́ лю́дие вси.

Припев: Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа. Единожды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Единоро́дный Сы́не и Сло́ве Бо́жий, Безсме́ртен Сый, и изво́ливый спасе́ния на́шего ра́ди воплоти́тися от святы́я Богоро́дицы и Присноде́вы Мари́и, непрело́жно вочелове́чивыйся, распны́йся же, Христе́ Бо́же, сме́ртию смерть попра́вый, Еди́н Сый Святы́я Тро́ицы, спрославля́емый Отцу́ и Свято́му Ду́ху, спаси́ нас.

Антифон 3-й, псалом 67, глас 5:

Стих 1: Да воскре́снет Бог и расточа́тся врази́ Его́.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

То́йже стих: Да воскре́снет Бог и расточа́тся врази́ Его́, и да бежа́т от лица́ Его́ ненави́дящии Его́.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Стих 2: Я́ко исчеза́ет дым, да исче́знут, я́ко та́ет воск от лица́ огня́.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Стих 3: Та́ко да поги́бнут гре́шницы от лица́ Бо́жия, а пра́ведницы да возвеселя́тся, да возра́дуются пред Бо́гом.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Ипакои́, глас 4

Предвари́вшия у́тро я́же о Мари́и, и обре́тшия ка́мень отвале́н от гро́ба, слы́шаху от А́нгела: во све́те присносу́щнем Су́щаго с ме́ртвыми что и́щете, я́ко челове́ка? Ви́дите гро́бныя пелены́, тецы́те и ми́ру пропове́дите, я́ко воста́ Госпо́дь, умертви́вый смерть; я́ко есть Сын Бо́га, спаса́ющаго род че­лове́ческий.

Сла́ва,

Конда́к Богоро́дицы, глас 8:

От неистощи́мыя Ты, исто́чниче богоблагода́тный, подае́ши ми, точа́щи во́ды Твоея́ благода́ти, приснотеку́щий па́че сло́ва, я́ко бо Сло́во ро́ждшая па́че смы́сла, молю́ Ти ся, ороси́ мя благода́тию, да зову́ Ти: ра́дуйся, водо́ спаси́тельная.

И ны́не:

Конда́к, глас 8

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом мир да́руяй, па́дшим подая́й воскресе́ние.

Апостол и Евангелие

Прокимен, глас 8: Во всю зе́млю изы́де веща́ние их, и в концы́ вселе́нныя глаго́лы их.

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Прокимен, глас 3, песнь Богородицы: Вели́чит душа́ Моя́ Го́спода, и возра́довася дух Мой о Бо́зе, Спа́се Мое́м.

Дея́ний святы́х Апо́стол чте́ние.

Деяния святых Апостол, зачало 7:

Во дни о́ны, вку́пе Петр и Иоа́нн восхожда́ста во святи́лище на моли́тву в час девя́тый. И не́кий муж, хром от чре́ва ма́тере своея́ сый, носи́мь быва́ше, его́же полага́ху по вся дни пред две́рьми церко́вными, реко́мыми Кра́сными, проси́ти ми́лостыни от входя́щих в це́рковь. И́ же ви́дев Петра́ и Иоа́нна хотя́щыя вни́ти в це́рковь, проша́ше ми́лостыни. Воззре́в же Петр нань со Иоа́нном, рече́: воззри́ на ны. Он же прилежа́ше и́ма, мня не́что от нею́ прия́ти. Рече́ же Петр: сребра́ и зла́та несть у мене́, но е́же и́мам, сие́ ти даю́, во и́мя Иису́са Христа́ Назоре́а воста́ни и ходи́. И емь его́ за десну́ю ру́ку воздви́же, а́бие же утверди́ стеся его́, плесне́ и гле́зне, и вскочи́в ста и хожда́ше, и вни́де с ни́ма в це́рковь, ходя́ и скачя́ и хваля́ Бо́га.

Русский перевод: В то время Петр и Иоанн шли вместе в храм в час молитвы девятый. И был человек, хромой от чрева матери его, которого носили и сажали каждый день при дверях храма, называемых Красными, просить милостыни у входящих в храм. Он, увидев Петра и Иоанна перед входом в храм, просил у них милостыни. Петр с Иоанном, всмотревшись в него, сказали: взгляни на нас. И он пристально смотрел на них, надеясь получить от них что-нибудь. Но Петр сказал: серебра и золота нет у меня; а что имею, то даю тебе: во имя Иисуса Христа Назорея встань и ходи. И, взяв его за правую руку, поднял; и вдруг укрепились его ступни и колени, и вскочив, стал, и начал ходить, и вошел с ними в храм, ходя и скача, и хваля Бога.

Послание к филипписием, зачало 240:

Бра́тие, сие́ да му́дрствуется в вас, е́же и во Христе́ Иису́се, И́же во о́бразе Бо́жии сый, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́ и дарова́ Ему́ и́ мя, е́же па́че вся́каго и́мене, да о и́мени Иису́сове вся́ко коле́но поклони́тся небе́сных и земны́х и преиспо́дних, и всяк язы́к испове́сть, я́ко Госпо́дь Иису́с Христо́с в сла́ву Бо́га Отца́.

Русский перевод: Братия, в вас должны быть те же чувствования, какие и во Христе Иисусе: Он, будучи образом Божиим, не почитал хищением быть равным Богу; но уничижил Себя Самого, приняв образ раба, сделавшись подобным человекам и по виду став как человек; смирил Себя, быв послушным даже до смерти, и смерти крестной. Посему и Бог превознес Его и дал Ему имя выше всякого имени, дабы пред именем Иисуса преклонилось всякое колено небесных, земных и преисподних, и всякий язык исповедал, что Господь Иисус Христос в славу Бога Отца.

Аллилу́ия, аллилу́ия, аллилу́ия.

Стих: Испове́дят небеса́ чудеса́ Твоя́, Го́споди.

Аллилу́ия, аллилу́ия, аллилу́ия.

Стих: Бог прославля́емь в сове́те святы́х.

Аллилу́ия, аллилу́ия, аллилу́ия.

Стих: Слы́ши, Дщи, и виждь, и приклони́ у́хо Твое́.

Аллилу́ия, аллилу́ия, аллилу́ия.

Го́споди, поми́луй. Трижды.

От Иоа́нна свята́го Ева́нгелия чте́ние.

Сла́ва Тебе́, Го́споди, сла́ва Тебе́.

Евангелие от Иоанна, зачало 7:

Во вре́мя о́но, сни́де Иису́с в Капернау́м Сам и Ма́ти Его́, и бра́тия Его́ и ученицы́ Его́, и ту не мно́ги дни пребы́ша. И близ бе Па́сха иуде́йска, и взы́де во Иерусали́м Иису́с и обре́те в це́ркви продаю́щыя о́вцы и волы́ и го́луби, и пе́няжники седя́щыя. И сотвори́ бичь от ве́рвий, вся изгна́ из це́ркве, о́вцы и волы́, и торжнико́м разсы́па пе́нязи и дски опрове́рже. И продаю́щым го́луби рече́: возьми́те сия́ отсю́ду и не твори́те до́му Отца́ Моего́ до́му ку́пленаго. Помяну́ша же ученицы́ Его́, я́ко пи́сано есть: жа́лость до́му Твоего́ снесть Мя. Отвеща́ша же иуде́е и ре́ша Ему́: ко́е зна́мение явля́еши нам, я́ко сия́ твори́ши? Отвеща́ Иису́с и рече́ им: разорите́ це́рковь сию́, и тре́ми де́ньми воздви́гну ю́. Ре́ша же иуде́е: четы́редесять и шестию́ лет создана́ бысть це́рковь сия́, и Ты ли тре́ми де́ньми воздви́гнеши ю́? Он же глаго́лаше о це́ркви те́ла Своего́. Егда́ у́бо воста́ от ме́ртвых, помяну́ша ученицы́ Его́, я́ко се глаго́лаше, и ве́роваша Писа́нию и словеси́, е́же рече́ Иису́с.

 Русский перевод: В то время пришел Иисус в Капернаум, Сам и Матерь Его, и братья его, и ученики Его; и там пробыли немного дней. Приближалась Пасха Иудейская, и Иисус пришел в Иерусалим и нашел, что в храме продавали волов, овец и голубей, и сидели меновщики денег. И, сделав бич из веревок, выгнал из храма всех, также и овец и волов; и деньги у меновщиков рассыпал, а столы их опрокинул. И сказал продающим голубей: возьмите это отсюда и дома Отца Моего не делайте домом торговли. При сем ученики Его вспомнили, что написано: ревность по доме Твоем снедает Меня. На это Иудеи сказали: каким знамением докажешь Ты нам, что имеешь власть так поступать? Иисус сказал им в ответ: разрушьте храм сей, и Я в три дня воздвигну его. На это сказали Иудеи: сей храм строился сорок шесть лет, и Ты в три дня воздвигнешь его? А Он говорил о храме тела Своего. Когда же воскрес Он из мертвых, то ученики Его вспомнили, что Он говорил это, и поверили Писанию и слову, которое сказал Иисус.

Евангелие от Луки, зачало 54:

Во вре́мя о́но, вни́де Иису́с в весь не́кую, жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́а, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́а же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя, и сосца́, я́же еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́ще е́.

Русский перевод: В то время пришел Иисус в одно селение; здесь женщина, именем Марфа, приняла Его в дом свой; у неё была сестра, именем Мария, которая села у ног Иисуса и слушала слово Его. Марфа же заботилась о большом угощении и, подойдя, сказала: Господи! или Тебе нужды нет, что сестра моя одну меня оставила служить? скажи ей, чтобы помогла мне. Иисус же сказал ей в ответ: Марфа! Марфа! ты заботишься и суетишься о многом, а одно только нужно; Мария же избрала благую часть, которая не отнимется у неё. Когда же Он говорил это, одна женщина, возвысив голос из народа, сказала Ему: блаженно чрево, носившее Тебя, и сосцы, Тебя питавшие! А Он сказал: блаженны слышащие слово Божие и соблюдающие его.

Сла́ва Тебе́, Го́споди, сла́ва Тебе́.

Помяни́ нас, Го́споди, егда́ прии́деши во Ца́рствии Твое́м.

Помяни́ нас, Влады́ко, егда́ прии́деши во Ца́рствии Твое́м.

Помяни́ нас, Святы́й, егда́ прии́деши во Ца́рствии Твое́м.

Лик Небе́сный поет Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

Стих: Приступи́те к Нему́ и просвети́теся, и ли́ца ва́ша не постыдя́тся.

Лик Небе́сный поет Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

Слава: Лик святы́х А́нгел и Арха́нгел со все́ми Небе́сными Си́лами пое́т Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

И ныне: Ве́рую во еди́наго Бо́га Отца́, Вседержи́теля, Творца́ Не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век; Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с Небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны́ при Понти́йстем Пила́те, и страда́вша, и погребе́нна. И воскре́сшаго в тре́тий день, по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но Креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Осла́би, оста́ви, прости́, Бо́же, прегреше́ния на́ша, во́льная и нево́льная, я́же в сло́ве и в де́ле, я́же в ве́дении и не в ве́дении, я́же во дни́ и в нощи́, я́же во уме́ и в помышле́нии: вся нам прости́, я́ко Благ и Человеколю́бец.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

[Я́ко Твое́ есть Ца́рство и си́ла и сла́ва во ве́ки. Ами́нь. (Мф. 6: 9-13)]

Конда́к, глас 8

А́ще и во гроб снизше́л еси́, Безсме́ртне, но а́дову разруши́л еси́ си́лу и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом мир да́руяй, па́дшим подая́й воскресе́ние.

Сла́ва, и ны́не:

Вы́шняго освяще́нное Боже́ственное селе́ние, ра́дуйся. Тобо́ю бо даде́ся ра́дость, Богоро́дице, зову́щим: благослове́нна Ты в жена́х еси́, всенепоро́чная Влады́чице.

Го́споди, поми́луй. 40.

Еди́н свят, еди́н Госпо́дь Иису́с Христо́с, во сла́ву Бо́га Отца́. Ами́нь.

 Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Псалом 33: 

Благословлю́ Го́спода на вся́кое вре́мя, вы́ну хвала́ Его́ во усте́х мои́х.
О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю, и вознесе́м и́мя Его́ вку́пе. Взыска́х Го́спода, и услы́ша мя, и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и́, и от всех скорбе́й его́ спасе́ и́. Ополчи́тся А́нгел Госпо́день о́крест боя́щихся Его́, и изба́вит их. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси святи́и Его́, я́ко несть лише́ния боя́щимся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто есть челове́к хотя́й живо́т, любя́й дни ви́дети бла́ги? Удержи́ язы́к твой от зла, и устне́ твои́, е́же не глаго́лати льсти. Уклони́ся от зла и сотвори́ бла́го, взыщи́ ми́ра и пожени́ и́. О́чи Госпо́дни на пра́ведныя, и у́ши Его́ в моли́тву их. Лице́ же Госпо́дне на творя́щия зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их, и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегреша́т. Изба́вит Госпо́дь ду́ши раб Свои́х, и не прегреша́т вси упова́ющии на Него́.

А́нгел вопия́ше Благода́тней: Чи́стая Де́во, ра́дуйся! И па́ки реку́: ра́дуйся! Твой Сын воскре́се тридне́вен от гро́ба, и ме́ртвыя воздви́гнувый: лю́дие, весели́теся.

Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.

Сла́ва, и ны́не:

Го́споди, поми́луй. Трижды. Благослови́.

Отпу́ст

Христе́, воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый, и́стинный Бо́же наш, моли́твами Пречи́стыя Твоея́ Ма́тере и всех святы́х, поми́луй и спаси́ нас, я́ко Благ и Человеколю́бец. Ами́нь.

Христос Воскресе! Воистину Воскресе!

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

И нам дарова́ живо́т ве́чный, покланя́емся Его́ тридне́вному Воскресе́нию.

Последование вечерни
для домашнего (келейного) совершения

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Тропарь, глас 5:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Стих 1: Да воскре́снет Бог, и расточа́тся врази́ Его́, / и да бежа́т от Лица́ Его́ ненави́дящии Его́.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 2: Я́ко исчеза́ет дым, да исче́знут, / я́ко та́ет воск от лица́ огня́. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 3: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Стих 4: Сей день, его́же сотвори́ Госпо́дь, / возра́дуемся и возвесели́мся в онь. Христо́с воскре́се: единожды.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Сла́ва Отцу́ и Сы́ну и Свято́му Ду́ху.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

И ны́не и при́сно и во ве́ки веко́в. Ами́нь.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

И паки:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Го́споди, поми́луй, 12.

Сла́ва, и ны́не:

Го́споди, воззва́х, глас 8-й.

Го́споди, воззва́х к Тебе́, услы́ши мя. Услы́ши мя, Го́споди.

Го́споди, воззва́х к Тебе́, услы́ши мя: вонми́ гла́су моле́ния моего́, внегда́ воззва́ти ми к Тебе́. Услы́ши мя, Го́споди.

Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю — же́ртва вече́рняя. Услы́ши мя, Го́споди.

На 6: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Вече́рнюю песнь, и слове́сную слу́жбу, Тебе́, Христе́, прино́сим, я́ко благоволи́л еси́ поми́ловати нас Воскресе́нием.

И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Го́споди, Го́споди, не отве́ржи нас от Твоего́ лица́, но благоволи́ поми́ловати нас Воскресе́нием.

На 4: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Ра́дуйся, Сио́не Святы́й, ма́ти церкве́й, Бо́жие жили́ще, Ты бо прия́л еси́ пе́рвый, оставле́ние грехо́в, Воскресе́нием.

Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Е́же от Бо́га Отца́ Сло́во, пре́жде век Ро́ждшееся, в после́дняя же времена́, То́ежде от Неискусобра́чныя вопло́щшееся во́лею, распя́тие сме́ртное претерпе́: и дре́вле умерщвле́ннаго челове́ка спасе́ Свои́м Воскресе́нием.

На 2: Хвали́те Го́спода вси язы́цы, похвали́те Его́ вси лю́дие.

Е́же из ме́ртвых Твое́ Воскресе́ние славосло́вим Христе́, и́мже свободи́л еси́ Ада́мский род от а́дова мучи́тельства: и дарова́л еси́ мíрови я́ко Бог жизнь ве́чную и ве́лию ми́лость.

Сла́ва Тебе́, Христе́ Спа́се, Сы́не Бо́жий Единоро́дный, пригвозди́выйся на Кресте́, и воскресы́й из гро́ба тридне́вен.

Сла́ва, глас то́йже:

Тебе́ сла́вим, Го́споди, во́лею нас ра́ди Крест претерпе́вшаго, и Тебе́ покланя́емcя, Всеси́льне Спа́се, не отве́ржи нас от Лица́ Твоего́, но услы́ши и спаси́ ны Воскресе́нием Твои́м, Человеколю́бче.

И ны́не, Богоро́дичен, глас то́йже:

Царь Небе́сный за человеколю́бие на земли́ яви́ся, и с челове́ки поживе́: от Де́вы бо Чи́стыя плоть прие́мый, и из Нея́ проше́дый с восприя́тием. Еди́н есть Сын, сугу́б естество́м, но не Ипоста́сию. Те́мже соверше́нна Того́ Бо́га и соверше́нна Челове́ка вои́стину пропове́дающе, испове́дуем Христа́ Бо́га на́шего: Его́же моли́, Ма́ти Безневе́стная, поми́ловатися душа́м на́шим.

Свете тихий

Све́те ти́хий святы́я сла́вы, Безсме́ртнаго, Отца́ Небе́снаго, Свята́го Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пе́т бы́ти гла́сы преподо́бными, Сы́не Бо́жий, живо́т дая́й, те́мже мiр Тя сла́вит.

Проки́мен вели́кий, глас 8: Дал еси́ достоя́ние боя́щимся Тебе́, Го́споди.

Стих 1: От коне́ц земли́ к Тебе́ воззва́х.

Дал еси́ достоя́ние боя́щимся Тебе́, Го́споди.

Стих 2: Покры́юся в кро́ве крил Твои́х.

Дал еси́ достоя́ние боя́щимся Тебе́, Го́споди.

Стих 3: Та́ко  воспою́  и́мени  Твоему́  во ве́ки.

Дал еси́ достоя́ние боя́щимся Тебе́, Го́споди.

Го́споди, поми́луй. 40.

Сла́ва, и ны́не:

Сподо́би, Го́споди, в вечер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не, и при́сно, и во ве́ки веко́в. Ами́нь.

Го́споди, поми́луй. 12.

Сла́ва, и ны́не:

Стихи́ра на стихо́вне воскре́сная, глас 8:

Возше́л еси́ на Крест, Иису́се, снизше́дый с Небесе́, прише́л еси́ на смерть, Животе́ Безсме́ртный, к су́щим во тьме Свет и́стинный, к па́дшым всех Воскресе́ние, просвеще́ние и Спа́се наш, сла́ва Тебе́.

Стихи́ры Па́схи, глас 5:

Стих: Да воскре́снет Бог, и расточа́тся врази́ Его́.

Па́сха свяще́нная нам днесь показа́ся: Па́сха но́ва свята́я, Па́сха та́инственная, Па́сха всечестна́я, Па́сха, Христо́с Изба́витель, Па́сха непоро́чная, Па́сха вели́кая, Па́сха ве́рных, Па́сха, две́ри ра́йския нам отверза́ющая, Па́сха, всех освяща́ющая ве́рных.

Стих: Я́ко исчеза́ет дым, да исче́знут.

Прииди́те от виде́ния, жены́ благове́стницы, и Сио́ну рцы́те: приими́ от нас ра́дости благове́щения Воскресе́ния Христо́ва; красу́йся, лику́й и ра́дуйся, Иерусали́ме, Царя́ Христа́ узре́в, из гро́ба, я́ко Жениха́, происходя́ща.

Стих: Та́ко да поги́бнут гре́шницы от лица́ Бо́жия, а пра́ведницы да возвеселя́тся.

Мироно́сицы жены́, у́тру глубоку́, предста́вша гро́бу Живода́вца, обрето́ша А́нгела, на ка́мени седя́ща, и той, провеща́в им, си́це глаго́лаше: что и́щете Жива́го с ме́ртвыми? Что пла́чете Нетле́ннаго во тли? Ше́дше, пропове́дите ученико́м Его́.

Стих: Сей день, его́же сотвори́ Госпо́дь, возра́дуемся и возвесели́мся вонь.

Па́сха кра́сная, Па́сха, Госпо́дня Па́сха, Па́сха всечестна́я нам возсия́. Па́сха, ра́достию друг дру́га обы́мем. О Па́сха! Избавле́ние ско́рби, и́бо из гро́ба днесь, я́ко от черто́га возсия́в, Христо́с жены́ ра́дости испо́лни, глаго́ля: пропове́дите апо́столом.

Сла́ва, и ны́не:

Воскресе́ния день, и просвети́мся торжество́м, и друг дру́га обы́мем; рцем: бра́тие, и ненави́дящим нас прости́м вся Воскресе́нием, и та́ко возопии́м: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

Утверди́, Бо́же, святу́ю правосла́вную ве́ру правосла́вных христиа́н во век ве́ка.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Отпу́ст

Христе́, воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый, и́стинный Бо́же наш, моли́твами Пречи́стыя Твоея́ Ма́тере и всех святы́х, поми́луй и спаси́ нас, я́ко Благ и Человеколю́бец. Аминь.

Христос Воскресе! Воистину Воскресе!

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. Трижды.

И нам дарова́ живо́т ве́чный, покланя́емся Его́ тридне́вному Воскресе́нию.

Вели́каго господи́на и отца́ на́шего Кири́лла, Святе́йшаго Патриа́рха Моско́вскаго и всея́ Руси́, и господи́на на́шего высокопреосвяще́ннейшаго и́мярек, митрополи́та [или́: архиепи́скопа; или́: преосвяще́ннейшаго и́мярек, епи́скопа] [его́же есть о́бласть], настоя́теля, бра́тию и прихо́жан свята́го хра́ма на́шего, домоча́дцы на́ша и вся правосла́вныя христиа́ны, Го́споди, сохрани́ их на мно́гая ле́та.

Источник Патриархия.RU

(534)